កិច្ចសន្យាអាចត្រូវបានរៀបចំ ឬតាក់តែងឡេីងដោយសាមីភាគីនៃកិច្ចសន្យាផ្ទាល់ ឬដោយពឹងអ្នកជំនាញដែលមានវិជ្ជាជីវៈជួយបាន។ ក៏ប៉ុន្តែការពឹងពាក់អ្នកជំនាញ ដូចជាមេធាវីជាដេីម ត្រូវចំណាយប្រាក់សំរាប់សេវាកម្មរបស់គេ។ ហេតុនេះបានជាមានចម្ងល់ថា ហេតុអ្វីការរៀបចំកិច្ចសន្យាត្រូវពឹងអ្នកជំនាញ?

Contracts are drafted or prepared by parties of the contracts themself or by experts in profession for help. But to be helped from the professional experts such as Lawyers must be payed fees for their services. Therefore, there is a question why preparing a Contract needed an Expert?

ការពឹងពាក់អ្នកជំនាញពិតមែនតែមានការចំណាយប្រាក់ដែលអាចមេីលឃេីញថាជាគុណវិបត្តិមួយ តែគុណសម្បត្តិជាច្រេីនគេមិនគួរមេីលរំលងនោះទេ។ គុណសម្បត្តិទាំនោះ ដូចជា៖

1. ជំនាញលេីប្រធានបទនៃកិច្ចសន្យា៖ ការយល់ពីប្រភេទនៃកិច្ចសន្យា ដូចជាកិច្ចសន្យាក្រុមហ៊ុន លក្ខន្តិកៈក្រុមហ៊ុន កិច្ចសន្យាម៉ៅការសំណង់ កិច្ចសន្យាលក់អចលវត្ថុ កិច្ចសន្យាលក់ភាគហ៊ុន កិច្ចសន្យាជួលអចលនវត្ថុ កិច្ចសន្យាធានារ៉ាប់រង កិច្ចសន្យាលក់-ទិញទំនិញ សេវា ។ ល។ ជាហេតុអាចធ្វេីឲ្យការរៀបចំកិច្ចសន្យាបានត្រឹមត្រូវ និងល្អ ពីព្រោះបទ ប្បញ្ញត្តិដែលគ្រប់គ្រងលើប្រភេទកិច្ចសន្យាទំាងនោះក៏កំណត់ផ្សេងគ្នាដែរ ។
2. បទពិសោធន៍ដឹងពីបញ្ហានាំឲ្យវិវាទ ឬការបាត់បង់ប្រយោជន៍អាចកេីតឡេីង៖ អ្នកជំនាញអាចចែងខសន្យាបង្ការ ឬបំពេញនូវភាពប្រហោង ឬចន្លោះនោះ ដេីម្បីការពារទំនាស់ឬការបាត់បង់ផលប្រយោជន៍បានពេលខាងមុខ ពីព្រោះគាត់បានអនុវត្តជាវិជ្ជាជីវៈ និងធ្លាប់បានជួបនិងចូលរួមដោះស្រាយក្តីកន្លងមក ។
3. រៀបចំកិច្ចសន្យាស្របតាមច្បាប់តំរូវ និងមានសុពលភាពអនុវត្តទៅបាន៖ កិច្ចសន្យាមួយបើបានបង្កេីតឡេីងហេីយ តែមិនស្របច្បាប់ ប្រាកដជាអនុវត្តមិនបានទេ នោះនឹងនាំឲ្យបាត់បង់នូវផលប្រយោជន៍របស់ភាគីជាក់ជាមិនខាននៅពេលវិវាទកើតឡើង ជាពិសេសភាគីនៃកិច្ចសន្យាដែលស្លូត និងស្មោះត្រង់។
4. ផ្តល់យោបល់ពីការចែងនូវខសន្យាជាសមត្ថកិច្ចក្នុងការដោះស្រាយវិវាទ៖ ការចែងពីខសន្យាសំរាប់ដោះស្រាយវិវាទដែលជាសមត្ថកិច្ច នឹងជួយបំពេញបំណងភាគី ហើយធ្វើឲ្យងាយស្រួលក្នុងការដោះស្រាយវិវាទនាពេលខាងមុខ ក៏ដូចជាបានជួយកាត់បន្ថយការចំណាយរបស់ភាគីផងដែរ ។ ឧទាហរណ៏ ការលក់ដីធ្លីមួយកន្លែង ។ បើគូភាគីចង់ដោះស្រាយវិវាទក្រៅតុលាការដោយមានអ្នកទី៣ជួយ និងភាគីជាអ្នកធ្វើសេចក្តីសម្រេចដោះស្រាយ គេគួរចែងនូវខសន្យាពីសន្ធានកម្ម ឬការសម្រុះសម្រួល តែមិនមែនខសន្យាពីមជ្ឈត្តកម្ម ឬតុលាការនោះទេ។

សរុបសេចក្តីមក ការរៀបចំកិច្ចសន្យាដោយពឹងពាក់អ្នកជំនាញវិជ្ជាជីវៈ គឺទទួលបានគុណសម្បត្តិច្រេីនជាងគុណវិបត្តិដែលជាការចំណាយប្រាក់សំរាប់សេវាកម្មនោះ។ គុណសម្បត្តិទាំងនោះមាន៖ ត្រូវទៅតាមប្រភេទកិច្ចសន្យានីមួយៗ អាចបំពេញចន្លោះប្រហោងនាំឲ្យវិវាទឬបាត់បង់ផលប្រយោជន៍ ធ្វើឲ្យកិច្ចសន្យាស្របច្បាប់និងប្រតិបត្តិបាន និងចែងបង្ការនូវខសន្យាសំរាប់ដោះស្រាយវិវាទដែលសមស្របនិងងាយស្រួលដល់ភាគី។ ដូច្នេះការពឹងអ្នកជំនាញឲ្យជួយសរសេរកិច្ចសន្យានឹងធ្វេីឲ្យមានភាពប្រាកដថា កិច្ចសន្យានឹងរៀបរយបានល្អ ជាមួយការការពារផលប្រយោជន៍បាន ជាពិសេសអាចកាត់បន្ថយការចំណាយដ៏ច្រេីនសំរាប់ការទទួលខុសត្រូវលេីកិច្ចសន្យាខ្វះខាត និងការដោះស្រាយវិវាទនាអនាគត៕